गण्डकीमा थप २० जनामा कोरोना संक्रमण पुष्टि, कुल संक्रमित संख्या १५ सय ५ पुग्यो

१८ साउन  /  गण्डकी
गण्डकी प्रदेशमा कोरोना भाइरस (कोभिड(१९)का कारण थप २० जनामा संक्रमण पुष्टि भएको छ । आज ४ जना महिला सहित २० जना संक्रमित थपिएको छ । योसँगै प्रदेशमा संक्रमितको संख्या १५०५ पुगेको हो । क्षयरोग उपचार केन्द्र, पोखरा र पोखरा स्वास्थ्य विज्ञान प्रतिष्ठान पोखरामा गरिएको परीक्षणमा स्याङ्जाका ८ जना, कास्कीका ६ जना, लमजुङका ३ जना, तनहुँका २ जना र बागलुङका एकजनामा संक्रमण पुष्टि भएको हो । थपिएका संक्रमित स्याङजाको वालिङका ५ जना पुरुष र पुतली बजारका २ महिला र एक पुरुष गरी ३ जना रहेका छन् । यस्तै, कास्कीको रुपा गाउँपालिकाका २ महिलासहित ५ जना र पोखरा महानगरपालिकाका एकजना पुरुष रहेका छन् । लमजुङका संक्रमित २ जना सुन्दर बजार र एकजना दोर्दीका हुन् । तनहुँको म्याग्दे र आबुखैरेनीका एकरएकजना पुरुष रहेका छन् भने बागलुङको बागलुङ नगरपालिकाकै एक पुरुष रहेका छन् । गण्डकीमा हालसम्म १२४५ जना आइसोलेसनबाट डिस्चार्ज भएर घर गइसकेका छन् ।